എച്ച്.പി.വി (HPV) വാക്സിൻ: നിങ്ങളുടെ കുട്ടികൾക്ക് ഇത് പ്രധാനമായിരിക്കുന്നത് എന്തുകൊണ്ട്?

വാക്സിനുകളെക്കുറിച്ച് ചിന്തിക്കുമ്പോൾ, കുട്ടിക്കാലത്ത് ഉണ്ടാകുന്ന മീസിൽസ്, പോളിയോ പോലുള്ള രോഗങ്ങളിൽ നിന്നുള്ള സംരക്ഷണമാണ് സാധാരണയായി നമ്മുടെ മനസ്സിൽ വരുന്നത്. എന്നാൽ ഒരു വാക്സിന് കാൻസറിനെ തടയാൻ കഴിഞ്ഞാൽ എങ്ങനെയിരിക്കും? ഹ്യൂമൻ പാപ്പിലോമ വൈറസ് (എച്ച്.പി.വി) വാക്സിൻ - എച്ച്.പി.വി മൂലമുണ്ടാകുന്ന കാൻസറുകൾക്കും മറ്റ് അവസ്ഥകൾക്കുമെതിരെയുള്ള പോരാട്ടത്തിലെ ശക്തമായ ഒരു ആയുധം. ഇന്ത്യൻ അക്കാദമി ഓഫ് പീഡിയാട്രിക്സ് വാക്സിൻ ആൻഡ് ഇമ്മ്യൂണൈസേഷൻ പ്രാക്ടീസസ് (ഐ.എ.പി-എ.സി.വി.ഐ.പി) കമ്മിറ്റിയുടെ 2023-ലെ പുതിയ മാർഗ്ഗനിർദ്ദേശങ്ങളിൽ ആൺകുട്ടികൾക്കും പെൺകുട്ടികൾക്കും എച്ച്.പി.വി വാക്സിൻ ശുപാർശ ചെയ്യുന്നു. ലിംഗഭേദമില്ലാത്ത വാക്സിനേഷനിലേക്കുള്ള ഒരു സുപ്രധാന ചുവടുവയ്പ്പാണിത്. ഇതിൻ്റെ പ്രാധാന്യവും, ഇത് എങ്ങനെ ഇന്ത്യയുടെ ആരോഗ്യത്തെ സ്വാധീനിക്കുമെന്നും നമുക്ക് നോക്കാം.
എച്ച്.പി.വി വാക്സിനേഷനിൽ ഒരു പുതിയ യുഗം
 2024 ജനുവരിയിൽ -ഇന്ത്യൻ അക്കാദമി ഓഫ് പീഡിയാട്രിക്സ് HPV വാക്സിനെ കുറിച്ചുള്ള പുതുക്കിയ മാർഗനിർദ്ദേശങ്ങൾ പുറപ്പെടുവിച്ചു . എടുത്തു പറയേണ്ട ഒരു പ്രധാന മാറ്റം , എച്ച്.പി.വി വാക്സിൻ ഇനി പെൺകുട്ടികൾക്ക് മാത്രമല്ല, ആൺകുട്ടികൾക്കും നൽകാം എന്നതാണ്. 9-14 വയസ്സുവരെയുള്ള കുട്ടികൾക്ക് 2 ഡോസ് വാക്സിൻ മതിയാകും. പ്രായമായവർക്ക് (15-18 വയസ്സ്) 3 ഡോസ് എടുക്കണം. ആൺകുട്ടികൾക്ക് എച്ച്.പി.വി വാക്സിൻ ശുപാർശ ചെയ്യുന്ന ലോകത്തിലെ 47 രാജ്യങ്ങളുടെ പട്ടികയിലേക്ക് ഇന്ത്യയും എത്തിച്ചേർന്നു. കൂടാതെ 125 രാജ്യങ്ങൾ പെൺകുട്ടികൾക്കുള്ള ദേശീയ പ്രതിരോധ കുത്തിവയ്പ്പ് പരിപാടിയിൽ ഇത് ഉൾപ്പെടുത്തിയിട്ടുണ്ട്.

എന്ത് കൊണ്ട് ഈ മാറ്റം ?

ഉത്തരം ലളിതമാണ്: എച്ച്.പി.വി ലിംഗഭേദം പരിഗണിക്കാതെ എല്ലാവരെയും ബാധിക്കുന്നു. ഇത് സ്ത്രീകളിൽ സെർവിക്കൽ കാൻസറിന് കാരണമാകുന്നു. പുരുഷൻമാരിൽ ഉണ്ടാകുന്ന തൊണ്ട, മലദ്വാരം, ലിംഗം എന്നിവിടങ്ങളിലെ കാൻസറുകൾക്കും എച്ച്.പി.വി ഒരു പ്രധാന കാരണമാണ്. ആൺകുട്ടികൾക്കും പെൺകുട്ടികൾക്കും വാക്സിൻ നൽകുന്നതിലൂടെ എച്ച്.പി.വി പകരുന്നത് തടയാനും സമൂഹത്തിൽ രോഗപ്രതിരോധശേഷി വർദ്ധിപ്പിക്കാനും സാധിക്കും എന്ന് ഐ.എ.പി പറയുന്നു. പെൺകുട്ടികൾക്ക് മാത്രമുള്ള വാക്സിൻ നൽകുന്നതിലൂടെ രോഗത്തെ പൂർണ്ണമായി ഇല്ലാതാക്കാൻ കഴിയില്ല. ലിംഗഭേദമില്ലാത്ത വാക്സിനേഷൻ (ജി.എൻ.വി-Genter neutral vaccination)) ആണ് ഇതിനുള്ള പ്രധാന പരിഹാരം.
വാക്സിൻ്റെ ശാസ്ത്രം
എച്ച്.പി.വി വാക്സിൻ

9-valent (9vHPV), 4-valent (4vHPV,) എന്ന് രണ്ട് പ്രധാന  വക ഭേദങ്ങളിൽ ലഭ്യമാണ് . 9vHPV ഒമ്പത് എച്ച്.പി.വി strains-നെതിരെ (6, 11, 16, 18, 31, 33, 45, 52, 58) പ്രതിരോധം നൽകുന്നു. 4vHPV നാല് strains-നെതിരെയും (6, 11, 16, 18) പ്രതിരോധം നൽകുന്നു. ഇവ രണ്ടും വളരെ ഫലപ്രദമാണ്. എന്നാൽ 9vHPV കൂടുതൽ സംരക്ഷണം നൽകുന്നു.

ആൺകുട്ടികൾക്കും ഇത് എന്തുകൊണ്ട്?

ഗർഭാശയമുഖത്തെ ബാധിക്കുന്ന കാൻസർ (cervical കാൻസർ) തടയാൻ ആയിരുന്നു മുൻകാലങ്ങളിൽ ഉപയോഗിച്ചിരുന്നത് , cervical കാൻസർ HPV  ടൈപ്പ് 16, 18 മൂലമാണ് ഉണ്ടാകുന്നത്. എന്നാൽ ഈ വൈറസ് മറ്റ് കാൻസറുകൾക്കും കാരണമാകുന്നു:
 * ഓറോഫാരിഞ്ചിയൽ കാൻസർ (വായിലും തൊണ്ടയിലും ഉണ്ടാകുന്നത്): 2020-ൽ ഇന്ത്യയിൽ 17,175 പുരുഷൻമാർക്കും 3,442 സ്ത്രീകൾക്കും ഈ കാൻസർ ഉണ്ടായി. അതിൽ 47% എച്ച്.പി.വി മൂലമാണ്. HPV16 കാരണമുണ്ടാകുന്ന ഈ കാൻസർ പുകവലിക്കാത്ത ചെറുപ്പക്കാരെയാണ് സാധാരണയായി ബാധിക്കുന്നത്.
 * മലദ്വാര കാൻസർ: ആഗോളതലത്തിൽ, 90% മലദ്വാര കാൻസറുകളും എച്ച്.പി.വി മൂലമാണ് ഉണ്ടാകുന്നത്. 2020-ൽ ഇന്ത്യയിൽ 3,111 പുരുഷൻമാർക്കും 2,341 സ്ത്രീകൾക്കും ഈ രോഗം റിപ്പോർട്ട് ചെയ്തു.
 * ലിംഗ കാൻസർ(penile cancer): 2020-ൽ ഇന്ത്യയിൽ 10,677 കേസുകൾ റിപ്പോർട്ട് ചെയ്തു. അതിൽ 42.5% എച്ച്.പി.വി മൂലമാണ്. ഇവിടെയും HPV16 ആണ് പ്രധാന കാരണം.
   കൂടാതെ ജനനേന്ദ്രിയത്തിലെ കുരുക്കളും (wart )(HPV 6, 11 കാരണമുണ്ടാകുന്നത്) കണക്കിലെടുക്കുമ്പോൾ ആൺകുട്ടികൾക്ക് ഇത് മൂലമുണ്ടാകുന്ന അപകടങ്ങളെക്കുറിച്ച് വ്യക്തമാകും. ആൺകുട്ടികൾക്ക് വാക്സിൻ നൽകുന്നതിലൂടെ അവരെ മാത്രമല്ല പെൺകുട്ടികളെയും ഈ രോഗത്തിൽ നിന്ന് സംരക്ഷിക്കാൻ കഴിയും. 

ആൺകുട്ടികൾക്കും പെൺകുട്ടികൾക്കും വാക്സിൻ നൽകുന്നതിലൂടെ ഈ വൈറസിനെ പൂർണ്ണമായി ഇല്ലാതാക്കാൻ സാധിക്കുമെന്നും ഐ.എ.പി പറയുന്നു.

എപ്പോൾ, എങ്ങനെ എടുക്കണം
 * 9-14 വയസ്സ് (ആൺകുട്ടികളും പെൺകുട്ടികളും): 2 ഡോസുകൾ, 6 മാസത്തെ ഇടവേളയിൽ
 * 15-26 വയസ്സ് (ആൺകുട്ടികളും പെൺകുട്ടികളും): 3 ഡോസുകൾ 0, 2, 6 മാസങ്ങളിൽ എടുക്കണം.

സുരക്ഷ
ഈ വാക്സിൻ സുരക്ഷിതമാണെന്ന് പഠനങ്ങൾ പറയുന്നു. കുത്തിവയ്പ്പ് എടുത്ത ഭാഗത്ത് വേദന, ചുവപ്പ് നിറം എന്നിവയാണ് സാധാരണയായി കാണുന്ന ചെറിയ ബുദ്ധിമുട്ടുകൾ.  CDC, WHO പോലുള്ള ആഗോള സംഘടനകൾ ഈ വാക്സിൻ സുരക്ഷിതമാണെന്ന് സാക്ഷ്യപ്പെടുത്തുന്നു.
.കൂടുതൽ വിവരങ്ങൾക്ക് , നിങ്ങളുടെ പീഡിയാട്രീഷ്യൻ-മായി സംസാരിക്കുക.